2017 թվականի դեկտեմբերի 1-ի դրությամբ ընկերությունն իրականացնում է 685253 բաժանորդի ներտնային գազասպառման համակարգերի տեխնիկական սպասարկում Մեր աշխատանքը Ձեր անվտանգության երաշխիքն է 2,98 մլն դրամ ամեն օր ՀՀ պետական բյուջե 903 աշխատող

lm
Հայաստանի քարտեզ
Երևան
Հասցե` ՀՀ, 0035, Երևան, Ռուբինյանց 27/3 
հեռ.` +374 (10) 23-86-70
Էլ. փոստ` aeg@aegservice.am
Skype: aeg-info

Տեխնիկական սերվիս կենտրոն

2010 թվականի մարտ ամսին սկսել է գործել ՀՀ տարածքում գազասպառման կենցաղային համակարգերի տեխնիկական սպասարկումն իրականացնող "Էյ-Ի-Ջի-Սերվիս" ՍՊԸ-ի Անվտանգության համակարգերի և միջոցների տեխնիկական սերվիս կենտրոնը:

Սերվիս կենտրոնը հավատարմագրվել է Չափագիտության ազգային ինստիտուտի կողմից:

Ներտնային գազասպառման համակարգերում անվտանգության մակարդակի բարձրացման և պատահարների կանխարգելման նպատակով դեռևս 2007 թվականի սկզբին ՀՀ կառավարության 22.02.2007 թ. N 314-Ն և 31.01.2008 թ. N 330-Ն որոշումներով սահմանվել է գազասպառողների բնակարանների ներանցնող մասում տեղադրել վթարային անջատիչ կափույր և այրվող գազերի ազդանշանային սարք: Այն նպատակ ունի գազազգայուն սարքավորումների տեղադրման միջոցով հնարավորինս նվազեցնել բնակելի շենքերում և գազասպառող այլ օբյեկտներում տեխնածին աղետների քանակը:

ՀՀ հանրային ծառայությունները կարգավորող հանձնաժողովը 06.06.2008 թ. թիվ 305 Ա որոշմամբ թույլատրել է "ՀայՌուսգազարդ" ՓԲԸ-ին մրցութային կարգով իրականացնել վթարային անջատիչ կափույրների և այրվող գազերի ազդանշանային սարքերի ձեռքբերում: Մրցույթում հաղթող է ճանաչվել չինական PUHAI Corporation ընկերությունը և կնքվել է մատակարարման պայմանագիր:


ՀՀ ողջ տարածքում 2008 թվականի դեկտեմբերի 1-ից սկսվել է անվտանգության համակարգերի տեղադրման բուն գործընթացը: 2011 թ. հունիսի 1-ի դրությամբ գազասպառող բաժանորդների բնակարաններում և առանձնատներում տեղադրվել են 557 057 ազդանշային սարքեր և անջատիչ կափույրներ (անվտանգության սարքեր): Հայաստանում գազասպառող բաժանորդների թիվը 616336 է: 59279 բաժանորդ դեռևս գազ է սպառում առանց բնակարաններում տեղադրվող անվտանգության համակարգերի: Գործընթացն արագացնելու և ընկերության առջև ծառացած լայնամասշտաբ ու պատասխանատու խնդիրը պատշաճ որակով լուծելու նպատակով "Էյ-Ի-Ջի-Սերվիս" ՍՊԸ-ում ստեղծվել է Անվտանգության համակարգերի և միջոցների տեխնիկական սերվիս կենտրոնը, որը գազասպառող բնակչության անվտանգությունն ապահովելուն ուղղված կարևոր օղակ պետք է հանդիսանա: ՀՀ-ում սույնով իրականացվում են անվտանգության համակարգերի տեղադրման, դրանց սպասարկման ու երաշխիքային վերանորոգման` նախադեպը չունեցող աշխատանքներ: Ընդ որում, Հայաստանն առաջինն է ԱՊՀ երկրների ցանցում, որտեղ գազասարքերից օգտվելիս մարդկային սուբյեկտիվ գործոնը հնարավորինս նվազեցնելու, տեխնածին աղետները կանխելու նպատակով իրականացվում է անվտանգության համակարգերի զանգվածային տեղադրում: Նշենք նաև, որ ՀՀ-ն ԱՊՀ երկրների թվում առաջինն է, որտեղ ներդրվել է անվտանգության համակարգերի ստուգման, թեսթավորման և վերանորոգման` ժամանակակից սարքավորումներով հագեցած տեխնիկական սերվիս կենտրոն:

2008 թվականի դեկտեմբերի 1-ից, անվտանգության համակարգերի առկայությամբ, կանխվել է գազի արտահոսքի մոտ 1000 դեպք: Սա նշանակում է, որ նույնքան ընտանիք, ինչու ոչ, նաև նրանց հարևանները, խուսափել են դժբախտ պատահարներից (թունավորում, պայթյուն), ինչը ենթադրում է նաև մահացության դեպքերի հավանականություն:

Ազդանշային սարքը տեղադրվում է պատին և միացվում էլեկտրասնուցման վարդակին: Գազի արտահոսքի դեպքում այն ձայնային և լուսային ազդանշան է հաղորդում: Անջատիչ կափույրը տեղադրվում է հաշվիչից հետո բնակարան մտնող գազի խողովակի վրա: Կափույրն աշխատում է, երբ ահազանգում է ազդանշանային սարքը (սրանք էլեկտրականությամբ փոխկապակցված են), և գազի մուտքը բնակարան մի քանի վայրկյանից ավտոմատ արգելափակվում է: Անվտանգության սարքերը նույնպես սպասարկում են "Էյ-Ի-Ջի-Սերվիս" ՍՊԸ փականագործները:

Ընկերությունում արձանագրվող կանչերի վերլուծությունը ցույց է տալիս, որ վթարային իրավիճակները, ներառյալ` թունավորման դեպքերը, ցավոք, հաճախ բնակիչների կողմից անվտանգության սարքերի ինքնական անջատումների հետևանք են:

Սերվիս կենտրոնի ստեղծմամբ իրականացվում է սարքերի վերանորոգման, 5 տարի պարբերականությամբ գազազգայուն տարրերի (սենսորներ) փոխարինման և այրվող գազերի ազդանշանային 24 սարքերի միաժամանակյա ստուգման համակարգչային ախտորոշման աշխատանքներ: Սերվիս կենտրոնի գործունեությամբ ապահովվելու է բնակարաններում անվտանգության համակարգերի անխափան աշխատանքը, ներառյալ, 5 տարին մեկ պարտադիր ստուգումները, պրոֆիլակտիկ ստուգումները, ինչպես նաև դրանց արդյունքում բացահայտված թերությունների վերացմանն ուղղված վերանորոգումները:

Սերվիս կենտրոնում գործող հիմնական սարքավորումները թեսթավորման և ախտորոշման ստենդերն են, որոնք նույնպես չինական PUHAI Corporation ընկերության արտադրանքն են և դրանց մոնտաժման, առաջին երաշխիքային ստուգումների ու վերանորոգման աշխատանքներն իրականացվել են չինական կողմից գործուղված մասնագետների աջակցությամբ: Չինացի մասնագետները նաև ուսուցում և վարպետության դասեր են անցկացրել մեր մասնագետների շրջանում:

Անվտանգության համակարգերի` վթարային անջատիչ կափույրների և ազդանշանային սարքերի ախտորոշումն ու թեսթավորումը ընթանում է 3 հիմնական փուլով և 3 համալիր ստենդերի միջոցով: Առանձին ստենդերի միջոցով իրականացվում է անվտանգության համակարգի էլեկտրամագնիսական անջատիչ կափույրի, ազդանշանային սարքի ստուգման, ապա նաև գազազգայուն տարրերի (սենսորներ) փոխարինման աշխատանքները:

Անհրաժեշտության դեպքում ստուգման և վերանորոգման փուլերն անցնելուց հետո ազդանշանային համակարգը հաշվառվում է և փաթեթավորվում, այսինքն, կրկին պատրաստ է շահագործման:

Հաշվառումը ներառում է յուրաքանչյուր ազդանշանային համակարգի վերաբերյալ անձնագրային տեղեկություններ, տեղեկություն տեղադրման օրվա, ստուգումների և վերանորոգումների ամսաթվերի մասին: Այս նպատակով սերվիս կենտրոնում ստեղծվել է համակարգչային տեղեկատվական բազա:

Սերվիս կենտրոնում ձեռք են բերվել նաև շարժական սարքեր, որոնց միջոցով պրոֆիլակտիկ ստուգումներ են իրականացվում տեղում, առանց համակարգը կենտրոն տեղափոխելու: Երբ բնակարանի ազդանշանային սարքը գործում է և բնակիչն ահազանգում է, մասնագետներն այս սարքի միջոցով հենց բնակարանում կարող են որոշել ազդանշանի պատճառը: Անսարքության բացահայտման դեպքում անվտանգության համակարգը փոխարինվում է նորով, իսկ վնասված սարքը բերվում է սերվի կենտրոն` ատուգման և անհրաժեշտության դեպքում` վերանորոգման: Ի դեպ, ազդանշանային սարքի կառուցվածքը ներառում է հիշողության համակարգ (սև արկղ), որտեղ տվյալները պահպանվում են 25 ժամվա ընթացքում: Այսինքն, մասնագետը ներկայանալով բնակարան կարող է աշխատանքային համակարգչի` նոտբուքի համապատասխան ծրագրի միջոցով ազդանշանային սարքից կարդալ, թե ինչ է տեղի ունեցել բնակարանում` շմոլ գազի առկայությու՞ն, մեթանի արտահո՞սք թե՞ սարքի խափանում: